Certifícate

La Certificación ecolóxica

Una certificación oficial

El logotipu de la producción ecolóxica de la UE ye una certificación oficial. El Reglamentu (UE) 2018/848 sobro producción ecolóxica y etiquetáu de los productos ecolóxicos establez un sistema de certificación que dexe identificar a los operadores que cumplen les normes de producción ecolóxica. Por ello, el Reglamentu establez qu’antes de comercializar un productu como “ecolóxicu” o “en conversión”, los operadores tienen de comunicar la so actividá a l’autoridá competente por que la so empresa sometese al sistema de control.

N’Asturies, esta comunicación faise por aciu de la solicitú d’inscripción nos rexistros del COPAE, al ser l’autoridá de control ecolóxicu, y ye la entidá encargada de conceder el certificáu a los operadores que cumplan el Reglamentu. Los operadores que tán exentos de la obligación de tar en posesión del certificáu son los comercios que viendan productos ecolóxicos envasaos directamente al consumidor o usuariu final.

 

N’Asturies, los comercios que viendan productos ecolóxicos a granel o de forma fraccionada, tamién tienen que tar certificaos pol COPAE.

Tresparencia del sistema

El Reglamentu establez les condiciones que tienen que cumplir los organismos y autoridaes de control, por que tengan conocencies y esperiencia y por qu’ufierten abondes garantíes d’oxetividá ya imparcialidá y tean llibres de cualquier conflictu d’intereses no que respecta al exerciciu de les sos xeres de control.

 

Pa garantizar la tresparencia del sistema de certificación, los países de la UE tán obligaos a facer públiques les llistes d’operadores certificaos y les tases que s’afiten polos controles efectuaos pa verificar el cumplimientu de les normes de producción ecolóxica.

Una certificación pública

La normativa europea establez la posibilidá de que’l sistema de control y certificación llevase a cabu por organismos privaos de control o por autoridaes de control. N’Asturies, el COPAE ye l’autoridá de control y ye una entidá con calter públicu y ensin ánimu d’arriquecimientu. El COPAE tien en cuenta a los pequenos llabradores y operadores por que los costos d’inspección nun enzanquen l’accesu a la certificación.

 

Cola fin d’harmonizar la interpretación de les normes, y de defender una certificación pública, el COPAE ye sociu de Intereco, asociación ensin ánimu d’arriquecimientu qu’arrexunta a les autoridaes públiques de control de l’agricultura ecolóxica, pa realizar acciones conxuntes nel desenvolvimientu de l’agricultura ecolóxica.

Ventayes de la certificación

Una certificación necesaria

La certificación ye necesaria por que’l consumidor tenga la máxima garantía de que los productos fueron producíos, ellaboraos, envasaos y comercializaos según les normes de producción ecolóxica.

 

Pa ello, los organismos y autoridaes de control realicen controles refechos a los sos operadores y analítiques de los productos pa detectar posibles borrafes de sustancies prohibíes, como pesticides de síntesis química, antibióticos, organismos modificaos xenéticamente, o aditivos y otres sustancies que nun se dexen en producción ecolóxica.

Un sector prometedor

La producción ecolóxica ye un sector prometedor y una esixencia del mercáu, polo que tamién hai que resaltar les ventayes competitives de la certificación ecolóxica y les meyores de rentabilidá pa los pequeños productores, que pueden consiguir un valor añedíu ameyorando la calidá de les sos producciones.

Condiciones y tramitación

  • Condiciones agricultura ecolóxica
  • Tramitación agricultura ecolóxica

L’agricultura ecolóxica ye un sistema de producción nel que nun s’autoriza l’usu de sustances químiques de síntesis (insecticides, funguicides, yerbicíes, etc.) nin d’organismos modificaos xenéticamente. La normativa sobro agricultura ecolóxica establez les condiciones por que un cultivu pueda certificase como procedente de l’agricultura ecolóxica. Nuna esplotación ecolóxica tienen de cumplise una serie de principios y normes de producción sobro l’orixe de les granes, la fertilización, el control de plantes adventicies, plagues y enfermedaes, etc.

 

El períodu transitoriu, mientres el cual introdúcense les técniques d’agricultura ecolóxica na esplotación, ye lo que se conoz como períodu de conversión. El períodu de conversión empecípiase, tres la solicitú d’incorporación de la unidá de producción nos rexistros del COPAE, dende esi momentu tien de cumplise la normativa de producción ecolóxica, quedando sometida la esplotación al control del COPAE.

 

Los períodos de conversión tienen la siguiente duración:

  • Cultivos añales y herbales: 2 años.
  • Praderíes: 2 años
  • Cultivos viviegos (frutales, etc): 3 años.

 

El períodu de conversión podría amenorgase siempres qu’esistan pruebes enforma de que’l terrén nun fuera tratáu con productos ensin autorizar pola normativa d’agricultura ecolóxica mientres un períodu mínimu de trés años.

 

P’ampliar la información sobro les normes de producción n’agricultura ecolóxica puede descargase una guía sobro agricultura ecolóxica. Equí van atopar les respuestes sobro lo que ye l’agricultura ecolóxica, les sos ventayes, cómo ta regulada, qué condiciones s’esixen y qué pasos son necesarios pa certificar una producción como ecolóxica y la so tramitación.

 

Guía sobro agricultura ecolóxica

Por que un llabrador pueda certificar la so producción como ecolóxica tien d’inscribise nel Rexistru d’Esplotaciones del COPAE. Pa ello tendrá de siguir los siguientes pasos:

  1. Presentar nel COPAE la documentación que s’indica: (descargar documentos)
    Documentación d’esplotación
    Solicitú d’inscripción
    Ficha de solicitú d’inscripción de parceles
    Ficha de la parcela
    Encuesta d’inscripción de la esplotación
    Plan de reconversión
  2. Cuando la solicitú yá ta completa, un técnicu del COPAE va alcordar col productor la fecha pa la realización de l’auditoría inicial, realizando xuna visita de la esplotación onde se van comprobar los datos de la solicitú.
  3. Dempués de l’auditoría inicial, el Comité de Certificación va afitar les condiciones d’inscripción y los períodos de conversión. El COPAE va comunicar el resolvimientu.
  4. Una vegada inscritu, el productor tien obligación de caltener actualizáu un rexistru documental que-y va ser riquíu mientres les visites de siguimientu o inspección. Toa esplotación ta obligada a llevar unos rexistros d’intervenciones nes parceles (abonu, tratamientos fitosanitarios, llantadera y plantíu), entraes de productos (abonos, fitosanitarios, granes, plantes), rexistru de recueya y salíes de productu (productos recoyíos y vendíos como ecolóxicos).
  5. Pasada la fase d’entamu de control, los técnicos del COPAE van realizar visites periódiques de siguimientu que pueden ser con avisu previu o ensin él.
  • Condiciones ganaderia ecolóxica
  • Tramitación ganaderia ecolóxica

La ganadería ecolóxica ye un sistema de producción nel que nun s’autoriza l’usu de sustances químiques de síntesis (abonos químicos, yerbicíes) nin d’organismos modificaos genéticamente. Na ganadería ecolóxica respétase’l bienestar de los animales, ensin forzar los sos ciclos naturales, con agospiamientos afayadizos y accesu a camperes. Los animales alimentense con forraxes y piensos ecolóxicos, llograos principalmente na mesma esplotación. La sanidá basase na prevención d’enfermedaes por aciu la selección de races afeches a la zona, bones práctiques de manexu y alimentación afayadizo. Foméntase la diversidá xenética utilizando animales de races autóctones. La lexislación sobro ganadería ecolóxica establez una serie de condiciones por que la producción pueda certificase como procedente de la ganadería ecolóxica. Nuna esplotación ecolóxica tienen de cumplise una serie de principios y normes de producción sobro’l manexu de les camperes, el ganáu, l’alimentación , tratamientos veterinarios, xestión del cuchu y el purín, etc.

 

La fase d’adaptación na que s’incorporen na unidá de producción los métodos de producción ecolóxica ye lo que se conoz como periodu de conversión. Esti períodu aplícase tantu pa los animales como pa les tierres acomuñaes a la producción d’animales. El períodu de conversión empecipiar tres la solicitú d’incorporación de la unidá de producción nos rexistros del COPAE, dende esi momentu tien de cumplise la normativa de producción ecolóxica, nun pudiéndose comercializar la producción como ecolóxica hasta que rematara dichu períodu.

 

Los períodos de conversión tienen la siguiente duración:

  • Parceles que sían utilizaes pa la producción d’alimentos pa los animales: 2 años.
  • Equinos y bovinos, destináu a la producción de carne: 12 meses y nunca menos de les 3/4 cuartes partes del so tiempu de vida.
  • Animales destinaos a la producción de lleche: 6 meses.
  • Pequeños rumiantes y gochos: 6 meses.
  • Aves de corrolada, destinaes a la producción de carne (introducíes antes de los trés díes de vida): 10 selmanes.
  • Aves de corrolada destinaes a la producción de güevos: 6 selmanes.

 

En ganadería ecolóxica, aplícase xeneralmente una conversión simultánea del terrén y los animales con una duración total de dos años, realizándose la conversión del ganáu mientres la última fase de la conversión del terrén.

 

N’Asturies comercialízase la carne de xata asturiana de producción ecolóxica col certificáu del COPAE y del Conseyu Regulador de la IGP “Xata Asturiana”. Pa facilitar la certificación conxunta, dambos conseyos roblaron un conveniu de collaboración. Si quier inscribise nel Conseyu Regulador de la IGP “Xata Asturiana”, póngase en contactu con ellos ya indicarán-y los pasos pa realizar la tramitación. P’ampliar información sobro les normes de producción en ganadería ecolóxica puede descargase la Guía sobro Ganadería Ecolóxica.

 

P’ampliar información sobro les normes de producción en ganadería ecolóxica puede descargar la Guía sobro Ganadería Ecolóxica. Equí van atopar les respuestes sobro lo que ye la ganadería ecolóxica, les sos ventayes, cómo ta regulada, qué condiciones s’esixen y qué pasos son necesarios pa certificar una producción como ecolóxica según la so Tramitación.

 

Guía sobro ganadería ecolóxica

 

Por que un ganaderu pueda certificar la so producción como ecolóxica tien d’inscribise nel Rexistru d’Esplotaciones del COPAE. Pa ello tendrá de siguir los siguientes pasos:

  1. Presentar nel COPAE la documentación que s’indica de siguío:
    Documentación de la esplotación
    Ficha de solicitú d’inscripción de parceles
    Solicitud d’inscripción
    Ficha de la parcela
    Ficha de ganadería
    Encuesta d’inscripción de la esplotación
    Plan de reconversión
  2. Cuando la solicitú yá ta completa, un técnicu del COPAE va alcordar col productor la fecha pa la realización de l’auditoría inicial, realizando una visita de la esplotación onde se van comprobar los datos de la solicitú.
  3. Dempués de l’auditoría inicial, el Comité de Certificación va afitar les condiciones d’inscripción y los períodos de conversión. El COPAE va comunicar el resolvimientu.
  4. Una vegada inscritu, el productor tien obligación de caltener actualizáu un rexistru documental que-y va ser riquíu mientres les visites de siguimientu o inspección. Toa ganadería ta obligada a llevar unos rexistros de tratamientos veterinarios, intervenciones nes parceles (abonos, llantadera), entraes agrícoles y ganaderes (piensos, forraxes, granes), rexistru de recueya y salíes de productu (cultivos y forraxes), rexistros de manexu y estabulación del ganáu (tendrá d’anotase la fecha de treslleche de los animales, entraes nel local de cebu, períodos d’estabulación), rexistru de l’alimentación de los animales (tipu d’alimentu y raciones emplegaes).
  5. Pasada la fase d’entamu de control, los técnicos del COPAE van realizar visites periódiques de siguimientu que pueden ser con avisu previu o ensin él.
  • Condiciones apicultura ecolóxica
  • Tramitación apicultura ecolóxica

L’apicultura ye uuna actividá importante pa la protección del mediu ambiente y la producción agroforestal gracies a l’acción polinizadora de les abeyes.

 

L’apicultura ecolóxica ye un sistema de producción nel que nun s’autoriza l’usu de sustances químiques de síntesis.

Nun s’autoriza l’usu de sustances químiques de síntesis, como acaricides pal tratamientu de parásitos como Varroa jacobsoni.

Nun s’autoriza l’usu d’antibióticos como tratamientu preventivu d’enfermedaes.

La sanidá basase na prevención d’enfermedaes por aciu la selección de races afeches a la zona, bones práctiques de manexu y alimentación afayadizo, dexando reserves de miel y polen abondos nel truébanu pa pasar l’iviernu.

La cera tendrá de ser anovada con cera de la mesma esplotación o con cera procedente d’otres esplotaciones ecolóxiques.

Los asentamientos tendrán de tar allugaos en zones de vexetación montesa, cultivos ecolóxicos y con accesu a agua en llugares onde nun esista riesgu de contaminación.

 

Los períodos de conversión:

La fase d’adaptación na que s’incorporen na unidá de producción los métodos de producción ecolóxica ye lo que se conoz como periodu de conversión, esti períodu aplicase a los productos de l’apicultura. El períodu de conversión empecípiase, tres la solicitú d’incorporación de la unidá de producción nos rexistros del COPAE, y dende esi momentu tien de cumplise la normativa de producción ecolóxica, quedando sometida la esplotación a control. Mientres el períodu de conversión la cera tendrá de ser anovada con cera de producción ecolóxica. Los productos de l’apicultura namái van poder vendese con referencies a métodos de producción ecolóxicos cuando se cumpliere la normativa de producción ecolóxica mientres a lo menos un añu.

 

P’ampliar la información sobro les normes de producción n’apicultura ecolóxica puede descargase la Guía sobro Apicultura Ecolóxica. Equí van atopar les respuestes sobro lo que ye l’apicultura ecolóxica, les sos ventayes, cómo ta regulada, qué condiciones s’esixen y qué pasos son necesarios pa certificar una producción como ecolóxica según la so Tramitación.

 

Guía sobro apicultura ecolóxica

Por que un apicultor pueda certificar la so producción como ecolóxica tien d’inscribise nel Rexistru d’Esplotaciones del COPAE. Pa ello tendrá de siguir los siguientes pasos:

 

1. Presentar nel COPAE la documentación que s’indica de siguío:
Documentación esplotación
Solicitú d’inscripción
Ficha de solicitú d’inscripción de colmenares
Ficha d’apicultura 1
Ficha d’apicultura 2
Encuesta d’inscripción d’esplotación
Plan de reconversión

 

2. Cuando la solicitú yá ta completa, un técnicu del COPAE va alcordar col productor la fecha pa la realización de l’auditoría inicial, realizando una visita de la esplotación pa comprobar los datos de la solicitú.

 

3. Dempués de l’auditoría inicial, el Comité de Certificación va afitar les condiciones d’inscripción y los períodos de conversión. El COPAE va comunicar el resolvimientu.

 

4. Una vegada inscritu, el productor tien obligación de caltener actualizáu un rexistru documental que-y va ser riquíu mientres les visites de siguimientu o inspección. Toa esplotación ta obligada a llevar unos rexistros de tratamientos veterinarios, intervenciones nos truébanos, entraes de productos, rexistru de recueya y salíes de productu, etc.

 

5. Pasada la fase d’entamu de control, los técnicos del COPAE van realizar visites periódiques de siguimientu que pueden ser con avisu previu o ensin él.

  • Condiciones acuicultura ecolóxica
  • Tramitación acuicultura ecolóxica

La recién aprobación d’unes normes d’acuicultura ecolóxica pa producción de trucha fai posible que les piscifactoríes d’Asturies puedan acoyese a esti tipu de producción, una y bones la calidá de les agües de los ríos asturianos dexen realizar perfectamente la producción de trucha ecolóxica. Por aciu la certificación puede estremase esti productu del procedente d’otros sistemes más intensivos y agresivos col mediu ambiente.

 

Condiciones:
La cría de truches col sistema ecolóxicu, ye otra manera d’entender la acuicultura, alloñada de los sistemes intensivos tradicionales.
Lo que impera nesti sistema de producción ye una integración de les piscifactoríes na redolada, l’agua que s’utiliza pa la cría de los pexes ye agua de monte, próxima a les nacencies de los ríos o procedentes de manantiales. Criar n’estanques con abondu espaciu pa dexar la natación, y el periodu de cría ye más llargu que l’utilizáu en cría intensiva, afaciéndose más a les condiciones de los pexes llibres. L’alimentación ye bien natural, basada principalmente en farines de pexe de pesca estractiva con una parte vexetal procedente d’agricultura ecolóxica.

Descargue les normes de producción de trucha ecolóxica pa más información. Si ta interesáu en tramitar la solicitú d’inscripción nel Rexistru de Productores del COPAE vaiga al estremu.


Normes de producción de trucha ecolóxica

Pa certificar la producción como procedente de acuicultura ecolóxica tendrá de dirixise al COPAE, únicu organismu autorizáu pa la certificación de la producción ecolóxica n’Asturies.
  • Condiciones ellaboración d’alimentos ecolóxicos
  • Tramitación ellaboración d’alimentos ecolóxicos

Toles fases de producción y tresformamientu de los productos ecolóxicos tienen que cumplir les condiciones establecíes nel Reglamentu (CE) 834/2007 y tar sometíes al so control, poro, la ellaboración d’alimentos ecolóxicos namái puede realizase n’industries inscrites nel COPAE, tanto los productos p’alimentación humano como los d’alimentación animal.

 

Tamién tienen de tar inscritos nel COPAE los operadores qu’almacenen o comercialicen productos ecolóxicos y aquellos qu’importen productos procedentes de países terceros (fora de la Unión Europea).

La ellaboración d’alimentos ecolóxicos puede realizase n’unidaes esclusives de productos ecolóxicos o n’unidaes que tamién ellaboren productos non ecolóxicos. Nesti segundu casu, la ellaboración de productos ecolóxicos tien de caltenese separtada; nel tiempu o nel espaciu; de los alimentos non ecolóxicos pa garantizar que nun esista riesgu d’amiestu o sustitución. Les operaciones de productos ecolóxicos namái pueden realizase dempués de la llimpieza de les instalaciones y los equipos de producción.

Namái pueden utilizase ingredientes agrarios procedentes de la producción ecolóxica. Los ingredientes d’orixe non agrariu, auxiliares tecnolóxicos y aditivos que pueden utilizase son los qu’apaecen na llista positiva del Reglamentu (CE) 834/2007.

 

P’ampliar información sobro les normes d’ellaboración puede descargar la Guía d’ellaboración y tresformamientu de productos ecolóxicos. Equí van atopar les respuestes sobro lo que ye la producción ecolóxica, les sos ventayes, cómo ta regulada, qué condiciones s’esixen y qué pasos son necesarios pa certificar un productu alimentario como ecolóxicu, según la so Tramitación.

Guía d’ellaboración y tresformamientu de productos ecolóxicos

 

Tramitación industria

Por qu’una industria pueda certificar la so producción como ecolóxica tien d’inscribise nel Rexistru d’Ellaboradores del COPAE. Pa ello tendrá de siguir los siguientes pasos

  1. Presentar nel COPAE la siguiente documentación:
  2. Cuando la solicitú yá ta completa, un técnicu del COPAE va alcordar col productor la fecha pa la realización de l’auditoría inicial, realizando una visita de la esplotación pa comprobar los datos de la solicitú.
  3. Dempués de l’auditoría inicial, el Comité de Certificación va afitar les condiciones d’inscripción y los períodos de conversión. El COPAE va comunicar el resolvimientu.
  4. Una vegada inscritu, l’operador va comunicar l’entamu de l’actividá teniendo obligación de caltener actualizáu un rexistru documental que-y va ser riquíu mientres les visites de siguimientu o inspección: rexistros d’entraes, rexistros de salíes, partes d’ellaboración, pa garantizar la trazabilidad del productu en tou momentu y rexistru d’esistencies. Amás va debese comunicar trimestralmente al COPAE la declaración de vientes de productu ecolóxicu. Les etiquetes y el material de publicidá del productu ecolóxicu ten de tar primeramente aprobaos pol COPAE
  5. Pasada la fase d’entamu de control, los técnicos del COPAE van realizar visites periódiques de siguimientu que pueden ser con avisu previu o ensin él..

 

 

Tramitacion importación

1. Los productos importaos d’un país terceru namái van poder comercializase como productos ecolóxicos cuando sían orixinarios d’un país terceru que figure na llista de países autorizaos del Ministeriu d’Agricultura, Pesca y Alimentación.

 

2. L’importador tendrá de llograr los rexistros oficiales qu’establez la normativa vixente y tar certificáu pol órganu de control de la producción agraria ecolóxica correspondiente.

 

3. Si ta interesáu en tramitar dicha certificación póngase en contactu col COPAE.

 

P’ampliar la información sobro la llista de países autorizaos y sobro el rexistru d’importadores puede consultar la páxina web del Ministeriu d’Agricultura, Pesca y Alimentación.

  • Condiciones comercios ecolóxicos
  • Tramitación comercios ecolóxicos

L’usu de los términos ECO, BIO, ecolóxicu, biolóxicu y orgánicu nos establecimientos o nel etiquetáu y la publicidá de los alimentos ta protexíu poles normes europees de producción ecolóxica.

 

Pa realizar la vienta de productos ecolóxicos a granel o de forma fraccionada, los comercios minoristes tienen la obligación de tar inscritos nel COPAE, una y bones esa actividá tien que tar suxeta al sistema de control, según establezse na normativa europea de producción ecolóxica y nel Resolvimientu de 9 de marzu de 2018, de la Conseyería de Desenvolvimientu Rural y Recursos Naturales, pola que se regulen determinaes exenciones relatives al sometimientu al réxime de control a los comerciantes minoristes del Principáu d’Asturies que vienden productos ecolóxicos directamente al consumidor o usuariu final.

 

Pa consiguir la certificación, los comercios van deber de garantizar que l’orixe de los productos ecolóxicos y la so correcta identificación. Nos comercios que viendan productos ecolóxicos y non ecolóxicos tendrán d’establecer midíes de separación pa evitar qu’esista riesgu d’amiestu o intercambiu, y pa evitar el tracamundiu per parte de el consumidores.

Pa realizar la vienta de productos ecolóxicos a granel o de forma fraccionada, los comercios minoristes tienen la obligación de tar inscritos nel COPAE, una y bones esa actividá tien que tar suxeta al sistema de control qu’establez la normativa europea de producción ecolóxica.

 

La inscripción nel COPAE tramítase unviando la siguiente solicitú: Solicitú d’Inscripción nel Rexistru de Comercios Minoristes. Por aciu la firma de la solicitú, l’establecimientu acepta’l cumplimientu de les normes de producción ecolóxica y los controles que s’establez nel so Reglamentu. Nel casu de que se comercialicen productos ecolóxicos y non ecolóxicos, los comercios tendrán d’establecer midíes de separación pa evitar qu’esista riesgu de tracamundiu per parte de los consumidores.

 

Una vegada recibida la solicitú y la documentación necesaria, el COPAE va realizar una visita inicial. En superando los controles y garantizáu’l cumplimientu de les normes de producción ecolóxica, el COPAE emite un certificáu de conformidá. Dende esi momentu, el comerciu va pasar a figurar nel Rexistru de Comercios Minoristes, onde puede consultase por tipu y comerciu o pol so allugamientu.

  • Condiciones restorantes ecolóxicos
  • Tramitación restorantes ecolóxicos

Los establecimientos de restauración que trabayen con productos ecolóxicos pueden faer usu de les indicaciones protexíes poles normes de producción ecolóxica, indicando aquellos ingredientes que sían ecolóxicos nun determináu platu, nun menú, na carta, o n’el mesmu establecimientu.

Pa dar mayor garantía a los consumidores de que los alimentos vienen de la producción ecolóxica, el COPAE ufierta la posibilidá de reconocer a los restoranes como “establecimientu collaborador”, identificando a los restoranes controlaos por aciu esta placa (enserta placa establec. collaborador)

Pa cuntar cola placa d’Establecimientu Collaborador del COPAE tendrá de cumplir les normes que regulen la comercialización de productos ecolóxicos n’Establecimientos de Restauración.

Puede inscribise nel COPAE unviando la  Solicitú d’Inscripción nel Rexistru d’Establecimientos de Restauración. Por aciu la firma del Conveniu ente’l COPAE y los Establecimientos Collaboradores, l’establecimientu acepta les condiciones que garanticen que los productos ecolóxicos van tar correchamente identificaos y separaos del restu de productos non ecolóxicos y sométese a control per parte del COPAE. A cambéu, el COPAE va asitiar nel so establecimientu un cartelu que lu identifica como establecimientu collaborador del COPAE. Dende esi momentu va figurar nel Llistáu d’establecimientos de restauración inscritos nel COPAE.

Entrugues frecuentes

¿Quién m'informa?

Primero de realizar la solicitú de la certificación, ye bien importante tar informáu de les normes de producción ecolóxica y conocer les midíes qu’hai que tomar pa garantizar el so cumplimientu. De siguío detállense les condiciones xenerales pa cada tipu d’actividá. Pa cualquier dulda o aclaración sobro la normativa ye meyor contactar directamente col serviciu técnicu del COPAE.

¿Cuánto tarda?

Hai que tener en cuenta que les producciones agrícoles y ganaderes tienen que pasar un períodu de conversión antes de poder comercializar la producción como ecolóxica. El períodu de conversión normal sueli ser de 2 años, pudiendo ampliase a 3 pa cultivos frutales o amenorgase a 12 pa parceles nes que se demuestre nun emplegar productos ensin dexar mientres los postreros 3 años.

La certificación d’empreses d’ellaboración y comercialización ye más rápida, yá que nestos casos nun esisten períodos de conversión.

¿Cuánto cuesta?

El COPAE publica les tases onde s’espliquen los costos de la certificación pa cada tipu d’actividá

¿Cómo se tramita?

El procesu de certificación empieza cola solicitú d’inscripción nel rexistru del COPAE. Una vegada recibida tola documentación, el COPAE plania la visita pa realizar una auditoría inicial. L’informe de la inspección ye revisáu pola dirección técnica. Les decisiones de la certificación tomar nel Comité de Certificación, últimu pasu antes de dar en emitir el certificáu de conformidá que dexa l’usu de les menciones protexíes nel etiquetáu y la publicidá pa comercializar los productos como ecolóxicos.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.

ACEPTAR
Aviso de cookies