Teléfonu: 985 773 558

 

Producción ecolóxica

Producción ecolóxica

Definición

El Reglamentu (UE) 2018/848 del Parlamentu Européu y del Conseyu de 30 de mayu de 2018 sobro producción ecolóxica y etiquetáu de los productos ecolóxicos y pol que se deroga’l Reglamentu (CE) 834/2007 del Conseyu, define la producción ecolóxica asina:

 

“La producción ecolóxica ye un sistema xeneral de xestión agrícola y producción d’alimentos que combina les meyores práctiques en materia de mediu ambiente y clima, un eleváu nivel de biodiversidá, el caltenimientu de los recursos naturales y l’aplicación de normes esixentes sobro bienestar animal y sobro producción que respuenden a la demanda, espresada por un creciente númberu de consumidores, de productos llograos a partir de sustancies y procesos naturales.

Con éses la producción ecolóxica desempeña un papel social doble suministrando, per un sitiu, un mercáu específicu que respuende a una demanda de productos ecolóxicos per parte de los consumidores y, por otru, apurriendo al públicu bienes que contribúin a la protección del mediu ambiente, al bienestar animal y al desenvolvimientu rural”.

La producción ecolóxica n’Asturies

Un entornu ideal pa la producción ecolóxica

N’Asturies esisten unes condiciones naturales escepcionales pa la producción ecolóxica. Les camperes húmedes y de monte entemecíos cola superficie forestal ocupen la mayor parte de la superficie de la rexón. Tenemos clima, agua, suelu y biodiversidá.

 

Les variedaes locales de cultivos y les races autóctones tamién xueguen un papel fundamental pal desenvolvimientu de la producción ecolóxica, pola so adaptación al mediu y la resistencia a enfermedaes.

Agricultura

La mayor parte de la superficie agrícola cultivada n’Asturies son pumaraes de variedaes locales, coles que s’ellabora zumu y sidre.

 

Otros cultivos importantes son l’arándanu y otros pequenos frutos, el quivi y otres variedaes de fruta. El clima tamién ye ideal pa dellos frutos secos como la castaña, la nuez o l’ablana.

 

En hortícultura predominen les pequenes producciones con gran diversidá de cultivos. Dalgunos de los cultivos tradicionales con variedaes locales son la faba y la escanda.

Ganadería

Asturies ye una rexón eminentemente ganadera, onde se caltién un manexu tradicional venceyáu al aprovechamientu de la campera y el forraxe de la mesma casería. Esto dexa que’l pasu a la producción ecolóxica sía menos complicáu que cuando se trata de producciones más intensives.

 

El mayor númberu de ganaderíes son de vacunu de carne, de les races autóctones Asturiana de Los Valles o Carreñana y Asturiana del Monte o Casina. La mayoría de les ganaderíes ecolóxiques tán acoyíes al Conseyu Regulador de la IGP Xata Asturiana.

El vacunu de lleche ye otra de les actividaes más importantes y con gran potencial en producción ecolóxica n’Asturies. La raza principal ye la frisona, anque tamién hai otres races más rústiques y afeches al llendar pastoril.

 

N’ovín y caprino el númberu de ganaderíes ye inferior. En producción ecolóxica tán dalgunos de los rebaños más importantes de les races autóctones asturianes en peligru d’estinción, la Oveya Xalda y la Cabra Bermeya.

 

Al igual que pasa en términos xenerales n’Asturies, en producción ecolóxica ye menor el númberu de ganaderíes como l’equín, y hai poques d’aves de corrolada y de porcín.

Apicultura

Asturies ye un paraísu pa les abeyes gracies a la diversidá d’alimentu qu’atopen na vexetación montesa, los montes, les camperes, y los cultivos tradicionales, como la pumarada.

 

Prodúcense distintos tipos de mieles n’Asturies, amás de les milflores hai mieles monoflorales d’ocalitu, castañal, brezu, carbayu…

Acuicultura y algues

La normativa de producción ecolóxica inclúi tanto la acuiculturacomo’l cultivu y recueyu d’algues marines.

 

La escelente calidá de les agües de los ríos asturianos y del Mar Cantábricu dexen la producción ecolóxica de trucha, el cultivu d’ostra, y el cultivu y recueyu de distintes especies d’algues.

Alimentos Ellaboraos

Cada vez esiste mayor variedá d’alimentos ecolóxicos que s’ellaboren n’Asturies. Nel rexistru d’ellaboradores del COPAE hai dende pequenes empreses artesanes a grandes industries agroalimentarias. Delles actividaes tán bien venceyaes a la producción primaria, y al mercáu local, por aciu canales curties de comercialización, ente qu’otres industries trabayen con mayores cantidaes y abren más mercáu nel esterior.

 

Nes actividaes industriales rellacionaes cola producción d’orixe vexetal hai un númberu eleváu de productos, dende conserves vexetales, zumos, sidre o productos de panadería hasta los piensos pal ganáu.

 

Nos productos d’orixe animal destaquen les industries cárnicas y lláctees, per delantre d’otros productos como’l miel, güevos, o les conserves de pexe.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.

ACEPTAR
Aviso de cookies